La Constituziun federala (art. 19 e 62 Cst.) garantescha ch'ils chantuns procuran per ina instrucziun da scola fundamentala suffizienta che po vegnir frequentada da tut ils uffants e ch'è gratuita en scolas publicas. Ils chantuns èn cumpetents per reglar e per survegliar la scola obligatorica. Las vischnancas èn las purtadras da las scolas primaras. Scolas dal stgalim secundar I pon er vegnir purtadas dal chantun.

Scolas da maturitad gimnasiala e scolas medias spezialisadas
Ils chantuns èn cumpetents per las scolas da maturitad gimnasiala e per las scolas medias spezialisadas. Els èn ils purtaders da las scolas e surpiglian lur surveglianza e lur finanziaziun. La Confederaziun ed ils chantuns èn cuminaivlamain responsabels per la renconuschientscha naziunala da la maturitad gimnasiala. Per la renconuschientscha da las scolas medias spezialisadas e da lur diploms valan regulaziuns interchantunalas.

Furmaziun fundamentala professiunala
Tut la furmaziun professiunala (furmaziun supplementara professiunala, furmaziun professiunala superiura e furmaziun supplementara orientada a la professiun) suttastat a la cumpetenza regulativa da la Confederaziun (art. 63 Cst.). La Lescha federala davart la furmaziun professiunala (LFPr) definescha la furmaziun professiunala sco incumbensa cuminaivla da la Confederaziun, dals chantuns e da las organisaziuns dal mund da lavur (OdML). Ils chantuns èn cumpetents per exequir la furmaziun fundamentala professiunala. Els surpiglian lur surveglianza e la part principala da la finanziaziun publica ed èn ils purtaders da las instituziuns da furmaziun. La direcziun strategica ed il svilup da tut la furmaziun professiunala è chaussa da la Confederaziun. Plinavant sa participescha ella a la finanziaziun. Las OdML ed ils manaschis surpiglian incumbensas impurtantas en il sectur da la furmaziun fundamentala professiunala e sa participeschan a la finanziaziun.

Furmaziun professiunala superiura
La furmaziun professiunala superiura è ina part da la furmaziun professiunala ed è suttamessa a la cumpetenza regulativa da la Confederaziun. La Confederaziun, ils chantuns e las organisaziuns dal mund da lavur (OdML) collavuran en il rom da lur cumpetenzas. Ils chantuns structureschan l'execuziun, èn ils purtaders d'in grond dumber d'instituts da scolaziun e surpiglian la surveglianza da las scolas spezialisadas superiuras. Las organisaziuns dal mund da lavur (OdML) reglan – cun l'approvaziun da la Confederaziun – differents aspects dals examens professiunals federals e dals examens professiunals superiurs. Ellas pon manar scolas spezialisadas superiuras e porscher curs preparatorics per ils examens professiunals federals e per ils examens professiunals federals superiurs. La Confederaziun ed ils chantuns sa participeschan a la finanziaziun da la furmaziun professiunala superiura. Tgi che sa prepara cun agid d'in curs preparatoric per in examen professiunal federal e per in examen professiunal federal superiur, survegn in sustegn finanzial da la Confederaziun. La Confederaziun surpiglia fin a 50 pertschient da las taxas da curs.

Scolas autas
Tenor la Constituziun federala (art. 63a Cst.) procuran la Confederaziun ed ils chantuns cuminaivlamain per in mund da scolas autas d'auta qualitad. Per realisar questa incumbensa constituziunala èn vegnids creads trais decrets:

• Lescha federala davart l'agid a las scolas autas e davart la coordinaziun en il sectur da las scolas autas svizras (LASA)
• Cunvegna interchantunala davart il sectur da las scolas autas svizras (Concordat da scola auta)
• Cunvegna tranter la Confederaziun ed ils chantuns davart la cooperaziun en il sectur da las scolas autas (CCoop-SA).

En la lescha federala vegn reglà tut il sectur da las scolas autas (scolas autas universitaras, scolas autas spezialisadas e scolas autas da pedagogia). La LASA è ina lescha da coordinaziun e da promoziun e regla las finamiras ed ils princips organisatorics e procedurals da la coordinaziun. La Cunvegna interchantunala regla la collavuraziun dals chantuns da cunvegna tranter els e cun la Confederaziun, e quai en connex cun la coordinaziun en il sectur da las scolas autas svizras. La Cunvegna da cooperaziun creescha ils organs cuminaivels, particularmain la Conferenza universitara svizra, la Conferenza dals recturs ed il Cussegl d'accreditaziun. Mintga scola auta e mintga instituziun federala e chantunala da scola auta posseda vinavant in'atgna basa legala da l'instituziun responsabla respectiva.

La collavuraziun tranter ils chantuns vegna pratitgada – tut tenor il stgalim da furmaziun e tut tenor l'incumbensa – sin plaun chantunal, regiunal u naziunal. Ils chantuns pon collavurar en differents secturs e coordinar lur stentas. Secturs che dovran soluziuns unitaras sin nivel naziunal (p.ex. las structuras da scola e las finamiras da furmaziun, la renconuschientscha da diploms) vegnan reglads sin plaun naziunal tras la Conferenza da las directuras e dals directurs chantunals da l'educaziun publica (CDEP). La CDEP reunescha 26 commembras e commembers da las regenzas chantunalas, ch'èn responsablas e responsabels per la furmaziun, per la cultura e per il sport. La CDEP ademplescha incumbensas ch'ils chantuns e las regiuns na pon betg ademplir sulets. Incumbensas che pretendan ina collavuraziun regiunala (p.ex. plans d'instrucziun linguistics regiunals) vegnan elavuradas da las conferenzas regiunalas da la CDEP. La collavuraziun dals chantuns vegn per regla reglada en contracts interchantunals giuridicamain liants (cunvegnas interchantunalas, concordats).