La CDEP

La CDEP è responsabla per coordinar la politica da furmaziun e da cultura sin plaun naziunal. Ella s’engascha per in’auta qualitad, per l’egualitad da las schanzas, per la permeabilitad e per la mobilitad en il sistem da furmaziun svizzer.

En Svizra portan ils chantuns la responsabladad principala per ils fatgs da furmaziun e da cultura. Els coordineschan lur lavur sin champ naziunal. Per far quai furman las 26 directuras e directurs chantunals da l'educaziun publica in’autoritad: la Conferenza da las directuras e dals directurs chantunals da l’educaziun publica (CDEP). Il Principadi da Liechtenstein sa participescha a las lavurs da la CDEP.

La CDEP agescha sa basond sin ils artitgels da furmaziun da la Constituziun federala e sin il dretg interchantunal en il sectur da la furmaziun. La CDEP agescha en moda subsidiara ed ademplescha incumbensas ch’ils chantuns e las regiuns na pon betg ademplir. En dumondas da la furmaziun collavura ella cun la Confederaziun. Ella represchenta la Svizra en organisaziuns internaziunalas, uschenavant che lur activitads pertutgan la suveranitad da scola e da cultura dals chantuns.